ब्राजिलले नयाँ दिल्ली जी-२० समिटका जनमुखी निर्णयहरूलाई अघि बढाउँदैछ: प्रधानमन्त्री मोदी
रियो दि जेनेरियो, ब्राजिलमा सोमबार (नोभेम्बर १८, २०२४) आयोजित जी-२० शिखर सम्मेलनको उद्घाटन सत्रमा भारतका प्रधानमन्त्री नरेन्द्र मोदीले ग्लोबल साउथका देशहरूले विश्वव्यापी द्वन्द्वका कारण खाद्य, इन्धन, र मलको कमीको मुख्य भार बेहोरिरहेको उल्लेख गरे।
प्रधानमन्त्री मोदीले ग्लोबल साउथका चुनौतीहरूमा ध्यान केन्द्रित गर्न आह्वान गर्दै भने, “विश्वव्यापी द्वन्द्वका कारण खाद्य, इन्धन र मल संकटबाट सबैभन्दा बढी प्रभावित ग्लोबल साउथका देशहरू भएका छन्। त्यसैले हाम्रा छलफलहरू तबमात्र सफल हुन सक्छन्, जब हामी ग्लोबल साउथका चुनौती र प्राथमिकताहरूलाई ध्यानमा राख्छौँ।”
प्रधानमन्त्री मोदीले ब्राजिलको “भोकमरी र गरिबीविरुद्धको विश्वव्यापी गठबन्धन” पहलको समर्थन व्यक्त गर्दै यो नयाँ दिल्ली जी-२० शिखर सम्मेलनमा अंगीकार गरिएका “डेकेन उच्चस्तरीय खाद्य सुरक्षा सिद्धान्त” कार्यान्वयनतर्फ महत्त्वपूर्ण कदम भएको बताए।
खाद्य सुरक्षालाई सुदृढ गर्न भारतले अफ्रिका लगायत अन्य क्षेत्रहरूमा उठाएका कदमहरूको चर्चा गर्दै उनले मलावी, जाम्बिया, र जिम्बाबेलाई हालै उपलब्ध गराइएको मानवीय सहयोगको उदाहरण प्रस्तुत गरे।
प्रधानमन्त्री मोदीले जी-२० अध्यक्षका रूपमा सफल आयोजनाका लागि ब्राजिलका राष्ट्रपति लुलालाई बधाई दिए। उनले भने, “नयाँ दिल्ली जी-२० शिखर सम्मेलनमा जनकेन्द्रित निर्णयहरूलाई ब्राजिलले आफ्नो अध्यक्षतामा थप अघि बढाएको छ।”
नयाँ दिल्ली शिखर सम्मेलनले दिगो विकास लक्ष्य, समावेशी विकास, महिलाहरूको नेतृत्वमा भएको विकास, र युवा शक्तिलाई प्राथमिकता दिएकोमा सन्तोष व्यक्त गर्दै प्रधानमन्त्री मोदीले ग्लोबल साउथको आशा र आकांक्षाहरूलाई सम्बोधन गर्न जी-२० को भूमिका महत्त्वपूर्ण रहेको उल्लेख गरे।
प्रधानमन्त्री मोदीले भारतले गरिबी र भोकमरीसँग जुझ्न अपनाएको रणनीतिमा विशेष जोड दिँदै भने, “पछिल्लो १० वर्षमा भारतले २५ करोड मानिसलाई गरिबीको रेखाबाट माथि ल्याएको छ र ८० करोड मानिसलाई निःशुल्क खाद्यान्न वितरण गरिरहेको छ।”
स्वास्थ्य सुरक्षामा उनले भने, ५५ करोड मानिस विश्वकै ठूलो स्वास्थ्य बीमा योजनाबाट लाभान्वित भएका छन्।
महिला नेतृत्व र समावेशी विकासमा योगदानबारे चर्चा गर्दै उनले ३० करोड महिला सूक्ष्म उद्यमीहरूलाई बैंकसँग जोडिएको र ऋण सुविधामा पहुँच उपलब्ध गराइएको बताए।
प्रधानमन्त्री मोदीले किसानहरूको लागि विश्वकै सबैभन्दा ठूलो बाली बीमा योजनाबाट ४ करोड किसानलाई २० अर्ब अमेरिकी डलर बराबरको लाभ पुगेको बताए। त्यस्तै, ११ करोड किसानलाई ४० अर्ब अमेरिकी डलर सहयोग उपलब्ध गराइएको र संस्थागत ऋणमार्फत ३०० अर्ब अमेरिकी डलर प्रदान गरिएको जानकारी दिए।
उनले भने, “हाम्रो सफलतामा मुख्य कारण हाम्रो दृष्टिकोण हो: ‘ब्याक टु बेसिक्स’ र ‘मार्च टु द फ्युचर’। हामीले प्राकृतिक खेती र जैविक खेतीमात्र ध्यान दिएनौँ, नयाँ प्रविधिमा पनि फोकस गर्यौँ।”
